請mài扭曲孫文支持亞洲弱小民族獨立ê本意
蔣為文/台越文化協會理事長、成大台文系副教授
最近中國國民黨kap一寡媒體為tio̍h營造中華民國建國一百年ê氣氛，刁工製作一寡節目來強化孫文hit寡中國國民黨黨國元老chham台灣ê歷史關係，thang 好掩崁中華民國外來統治台灣ê事實。其實，chit寡節目攏已經嚴重扭曲孫文支持亞洲弱小民族獨立ê本意！
19世紀尾ê台灣、越南攏已經淪為帝國ê殖民地，ah清國kap後來建立ê中華民國mā hō͘列強拆食kah呈現半殖民地ê狀態。因為仝款受帝國主義ê欺壓，所擺台灣、越南hām中國ê憂國之士tiāⁿ-tiāⁿ有聯繫甚至加入對方ê組織thang交換救國ê方法。
越南ê革命領導者「潘佩珠」tī 1904年成立秘密組織「維新會」。Hit ê會主張用武力暴動推翻法國政權thang建立君主立憲ê越南國。因為斯當時日本發動對前蘇聯ê軍事攻擊，koh得著勝利。Chit-ê國際局勢hō͘潘佩珠深深感覺明治維新了後國力大增ê日本ē-sái chiâⁿ做越南ê學習對象。所擺潘佩珠tī 1905年2月頭擺前往日本考察。
潘佩珠頭擺訪問日本tō遇tio̍h流亡日本ê梁啟超。梁啟超勸潘佩珠放棄用武力對抗法國殖民政權，改用啟發民智ê教育來提升政治、文化抵抗ê力量。透過梁啟超ê紹介，潘佩珠見tio̍h hit當時日本重要政治人物「大隈重信」kap「犬養毅」。經由犬養毅ê牽線，潘佩珠mā見tio̍h hit時tī日本ê孫文。孫文批評潘佩珠ê君主立憲觀念siuⁿ過保守，建議ài改做建立民主共和國。孫文主張亞洲弱小民族ài互相鬥saⁿ-kāng chiah ē-tàng達成各民族ê獨立。伊koh建議潘佩珠鼓勵越南人加入中國ê革命運動，等待中國革命成功了chiah koh hoan頭協助越南獨立建國。潘佩珠顛倒建議孫文ài先協助越南獨立，了後中國革命人士ē-sái以越南為反清ê基地。
為beh串連亞洲被殖民ê弱小民族，孫文m̄-nā bat來過台灣，mā bat前往越南河內，tī越南情婦ê協助下tiàm河內進行革命募款活動。仝款，越南ê國父「胡志明」為tio̍h走找中國ê協助，mā bat kúi擺出入中國。胡志明甚至bat hō͘中國國民黨認定是中國共產黨ê爪扒仔soah hông關tī廣西一年外。M̄-nā胡志明，koh有真濟越南人sio-soà投入中國ê革命運動，ǹg-bāng透過中國ê力量協助越南獨立。像講，「越南革命同盟會」ê「阮海臣」、「越南國民黨」ê「阮太學」kap「武鴻卿」hia-ê。
有寡媒體刁工放大台灣ê頭人「翁俊明」、「蔣渭水」hit-koá人參加中國同盟會台灣分會ê歷史，按算製造台灣人心向中國ê假象。其實，tī hit-ê追求民族獨立ê時代，台灣人參與中國革命活動ê真正歷史意義是teh追求台灣民族ê獨立，毋是所謂ê回歸中國！
Khah濟相關文章
‧1945年蔣介石軍隊代表聯軍同時佔領台灣kap北越‧胡志明《獄中日記》摘選