蔣為文/國立成功大學台灣文學系
台灣ê學校教育內底,歷史教科書lóng án-ne kā咱講「1945年日本戰敗,根據開羅宣言台灣回歸中國」。事實上,hit當時是聯軍統帥MacArthur要求蔣介石代表聯軍接收日軍佔領下ê台灣kap越南北部。Hit當時越南ê革命領導者「胡志明」因為看出蔣介石對越南ê野心,就想辦法kā蔣介石軍隊趕出越南。對照之下,hit當時ê台灣人因為無瞭解中國,kiò-sī蔣介石會來解救台灣,結局是親像俗語所講「siàm尿ê換siàm屎ê」。1949年以後蔣介石無所在thang去,只好繼續佔領台灣,講台灣是中國ê一部份。Hit時chūn胡志明若無kā越南趕走,恐驚仔越南chín mā是中國ê一部分。
胡志明tī 1924年去中國廣州進行政治活動 (李家忠2003:93)。胡志明tī廣州一方面組織在中國ê越南人,一方面koh hām中國ê革命團體(包含中國國民黨kap中國共產黨)聯繫。胡志明tī中國活動ê時間前後大約有10冬左右。伊hām中國共產黨lú行lú近,lō͘-bóe得失中國國民黨。Tī 1942年8月到1943年9月,胡志明hō͘中國國民黨監禁tī廣西。關tī監獄ê時,胡志明用漢文寫出有名ê《獄中日記》。日記lāi-té寫tio̍h:
走遍高山與峻岩,那知平路更難堪,高山遇虎終無恙,平路逢人卻被監。余原代表越南民,擬到中華見要人,無奈風波平地起,送余入獄作嘉賓。忠誠我本無心疚,卻被嫌疑做漢奸,處世原來非易易,而今處世更難難‧‧‧桂林無桂亦無林,只見山高與水深,榕蔭監房真可怕,白天黑黑夜沉沉‧‧‧解過廣西十三縣,住了十八個監房,試問余所犯何罪,罪在為民族盡忠‧‧‧。(Hồ Chí Minh 2003)
胡志明ê中國經驗對伊後來處理中越關係有真深ê影響。Tī 1945年8月15號日本天皇正式向聯軍投降chìn-chêng,越南ê領導者胡志明已經聽tio̍h風聲講日本可能接受美國、英國、蘇聯三國tī 「Postdam宣言」(the Postdam Proclamation『波次坦宣言』) lìn要求日本無條件投降ê主張。胡志明一聽tio̍h風聲tō開始準備beh tī越南各地發動起義游擊戰koh tī 8月16號組越南臨時政府,thang發揮「先發制人」ê功效。就án-ne,到kah hit年八月底,短短二禮拜ê時間,胡志明就真成功ê發動「八月革命」取得掌控越南ê優勢(Đinh Xuân Lâm 2001:364-371、廖碧珠2006:118)。
1945年8月15號日本投降了,聯軍指派蔣介石代表聯軍接收台灣kap越南北部(北緯16以上),kāng sî-chūn越南南部由英國代表接收(Lê Mậu Hãn 2001:10; Bộ Giáo Dục và Đào Tạo 2003:69;陳鴻瑜2003、康培德2007、楊碧川1998:103)。胡志明因為成功發動「八月革命」,一時得聲勢大好。伊就順hit-ê勢,趕tī蔣介石軍隊iáu bōe全面進入越南chìn-chêng就sûi tī 1945年9月初2宣布越南獨立kap成立「越南民主共和國」。
Hit當時蔣介石派雲南軍閥「盧漢」(1896-1974)帶領20萬兵進入越南河內(廖碧珠2006:117)。根據我hām越南老兵、名作家「黃進」(Hoàng Tiến) ê個人訪談:蔣介石ê軍隊一進入河內,kap hit kóa來台灣ê軍隊kāng-khoán,軍紀真bái,像講食物件、坐車m̄付錢,而且koh將傳染病chah入來越南。蔣介石佔領越南北部ê時要求越南ài負擔所有軍糧ê開銷、koh同時扶持「越南國民黨」(Việt Nam quốc dân đảng) kap 「越南革命同盟會」(Việt Nam cách mạng đồng minh hội) beh介入越南ê政治(Lê Mậu Hãn 2001:10; Bộ Giáo Dục và Đào Tạo 2003:76-77)。胡志明bat tī中國tòa--kòe、mā bat坐過中國國民黨ê監13個月,所以伊對中國人ê野心真了解。伊bat講過:「若beh一世人食中國人ê屎,khah輸暫時鼻法國人ê臭屁」(楊碧川1998:105、Hood 1992:16)。胡志明看m̄是勢,驚蔣介石tī越南ê力量lú來lú大,所以伊用苦肉計乎蔣介石離開越南。
胡志明tī 1946年3月初6 hām法國代表Sainteny簽訂「六三協定」(Hiệp định sơ bộ 6-3),內容包含:承認越南民主共和國是「France聯合」(Liên hiệp Phát) ê一部份,享有獨立ê政府、國會、軍隊kap財政;越南政府同意法國1萬5千名軍隊進入北部thang換掉中國國民黨ê軍隊,而且chit 1萬5千名法國兵ài tī 5冬內撤退(Bộ Giáo Dục và Đào Tạo 2003:78)。Kâng時期,法國tī 1946年2月28 tī重慶hām國民政府簽訂「中法關於法國放棄在華治外法權及其有關特權條約」kap「關於中國駐越北軍隊由法國軍隊接防之換文」等條約kap換文(陳鴻瑜2003、2004)。也就是法國用放棄tī中國ê治外法權kap特權來hām中國交換同意由法軍取代中國軍隊。胡志明就是利用法國kap國際局勢逼蔣介石退出越南。當蔣介石退出越南ê時,胡志明同時koh準備kap法國ê游擊戰。Che是hit當時真有名ê故事,tī越南ê高中歷史教科書lóng有記載。
原載 2008〈1945年蔣介石軍隊代表聯軍同時佔領台灣kap北越〉,《台灣風物》期刊,58(3),頁9-15。
參考冊目
Bộ Giáo Dục và Đào Tạo. 2003. Lịch Sử 12 Tập hai [高中歷史高三第二冊]. Hà Nội: NXB Giáo Dục.
Đinh, Xuân Lâm 2001. Đại Cương Lịch Sử Việt Nam Tập II [越南歷史大綱II]. Hà Nội: NXB Giáo Dục.
Hồ, Chí Minh. 2003. Nhật ký trong tù [獄中日記]. Hà Nội: NXB Chính Trị Quốc Gia.
Hood, Steven J. 1992. Dragons Entangled: Indochina and the China-Vietnam War. NY: M.E. Sharpe,Inc.
Lê, Mậu Hãn. 2001. Đại Cương Lịch Sử Việt Nam Tập III[越南歷史大綱III]. Hà Nội: NXB Giáo Dục.
李家忠編譯2003《越南國父胡志明》北京:世界知識。
康培德2007〈一九四六年二月二十八日──越南歷史經驗下的反思〉二二八學術研討會。
陳鴻瑜2003〈第二次世界大戰後中華民國對越南之政策(1945-1949年)〉行政院國科會補助專題研究計畫成果報告NSC 91-2414-H-004-057。
陳鴻瑜2004《中華民國與東南亞各國外交關係史(1912-2000)》臺北:鼎文。
楊碧川1998《胡志明與越南獨立》台北:一橋出版社。
廖碧珠2006《1940年代中國與越南關係之研究》碩士論文:中國文化大學。
讀khah chē相關ê文章
蔣為文2010 〈二十世紀初台灣kap越南羅馬字文學運動ê比較〉,《海翁台語文學》98期,4-42頁。「國民小學本土語文教材教法」研討會,9月5日,台中,台中教育大學。
蔣為文2009〈1979年中越邊界戰爭對台灣ê啟示〉,《大國霸權or小國人權》二二八事件61週年國際學術研討會會後論文集,頁736-751,台北,二二八基金會。
蔣為文2009〈滯越台籍日本兵吳連義之案例研究〉台灣的東南亞區域研究年度研討會,4月24-25日,台北,中央研究院。
蔣為文2007〈越南文學發展史kap伊對台灣文學ê啟示〉,《台灣文學評論》7卷4期,132-154頁。
蔣為文2006〈相逢tī他鄉異地越南ê兩個台灣同鄉〉
|